ગઝલ…

અહંકાર ઠેલીને ભીતર પ્રવેશો ,

સ્વયંને ઉકેલીને ભીતર પ્રવેશો .

 

લગીરેય શ્રદ્ધા બચી હોય બાકી ,

અગન તાપ ઝેલીને ભીતર પ્રવેશો .

 

ન હો ડૂબવું તો પહોંચો કિનારે ,

મરણ દાવ ખેલીને ભીતર પ્રવેશો .

 

હશે ગેબ વાતો ને ઝળહળ બધું ત્યાં ,

અહમ દૂર મેલીને ભીતર પ્રવેશો .

 

મદદ માગવા કોઈ સામે ધરે કર ,

બની જાવ બેલી ને ભીતર પ્રવેશો .

 

પલળવું ન બે ચાર છાંટા પડે ત્યાં ,

મચી હોય હેલી ને ભીતર પ્રવેશો .

 

મળી જાય ‘મરમી’ અમી દ્રષ્ટી એની ,

ખુલી જાય ડેલી ને ભીતર પ્રવેશો .